មណ្ឌលគិរី៖ ក្នុងរយៈពេល ៣ថ្ងៃ នាឱកាសពិធីបុណ្យភ្ជុំបិណ្ឌនេះ ទទួលបានភ្ញៀវទេសចរជាង ៧ពាន់នាក់ ថយចុះជិត ២៣% បើធៀបនឹងពិធីបុណ្យភ្ជុំបិណ្ឌឆ្នាំ២០២២។

ប្រធានមន្ទីរទេសចរណ៍ខេត្តមណ្ឌលគិរី លោក ស៊ាង សឿន បានឲ្យដឹងថា ក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ ចាប់ពីថ្ងៃទី១៣ ទី១៤ និងទី១៥ ខែតុលា ឆ្នាំ២០២៣ ភ្ញៀវទេសចរ ដែលបានមកទស្សនាកំសាន្តនៅខេត្តមណ្ឌលគិរី មានចំនួន ៧ ៦៧០នាក់ ថយចុះ ២២,១២% ដោយឆ្នាំ២០២២ មានទេសចរសរុប ៩ ៨៤៩នាក់។

លោក ស៊ាង សឿង បានឱ្យដឹងទៀតថា ភ្ញៀវទេសចរជាតិមានចំនួន ៧ ៣៥៩នាក់ ថយចុះ ខណៈទេសចរបរទេស សរុប ៣១១នាក់ កើនឡើង ៤០,០៩% ខណៈឆ្នាំ២០២២ ទេសចរបរទេសសរុប ២២២នាក់។

ប្រធានមន្ទីរទេសចរណ៍រូបនេះ បានបញ្ជាក់ថា មូលហេតុនៃការថយចុះ ដោយសារឆ្នាំនេះនៅរដូវវស្សាមានភ្លៀងធ្លាក់ច្រើននៅទូទាំងប្រទេស ភ្ញៀវទេសចរពិបាកដើរកំសាន្ត ម្យ៉ាងទៀត ភ្ញៀវភាគច្រើនត្រូវទៅលេងស្រុកកំណើត។

ចំពោះ ស្ថានភាពនៅក្នុងខេត្តបណ្ឌលគីរីមានសន្តិសុខសណ្តាប់ធ្នាប់ល្អ នៅទូទាំងខេត្ត ខណៈមានការរំខានដោយភ្លៀងធ្លាក់នៅតាមតំបន់ខ្លះ៕